Gereformeerde Kerk Centurion

Die webtuiste vir die Gereformeerde Kerk Centurion.

Die Here skeur self die weg vir ons oop na Hom toe 

Skriflesing: Mattheus 27:32-54; Hebreërs 10:1-25 (1953)
Teksvers: Mattheus 27:50-51a

Die doel van die kruisiging word vir ons geopenbaar toe God self die voorhangsel na die allerheiligste skeur. Die doel was dat ons toegang mag hê tot onse God. Ons Here Jesus Christus is die vervulling van die skadu’s van die tempel. Hy is vir ons verskeur, sodat ons deur Hom kan gaan na ons Vader. 

Ons het die opdrag om nou te leef in die teenwoordigheid van God die Heilige Gees, in die allerheiligste. Daar kan ons leef sonder vrees en met groot vrymoedigheid, omdat ons gereinig is in Christus se bloed. 

Die HERE kyk anders as mense

Skriflesing: 1 Samuel 16 (2020)
Teksvers: 1 Samuel 16:7

As mense is ons geneig om met die eerste oog opslag ‘n opinie te vorm. 

Sommige mense maak onmiddellik ‘n indruk op ons met hoe hulle lyk. Hierdie indruk is egter nie altyd ‘n getroue weerspieëling van die werklikheid nie. 

Samuel kry die opdrag om na Isai se huis te gaan om ‘n nuwe koning te salf, en met sy eerste indruk van Eliab, dink hy hier staan die nuwe koning. 

Maar die HERE kyk anders as mense. 

Sondag weer tyd vir nadenke

Skriflesing: Deut 5:12-15 (1983) 
Teksvers: Deut 5:15 

Moses herhaal die Wet of Tien Gebooie hier aan die nuwe geslag wat in die woestyn oorleef het. Hulle moet nadink oor waar hulle vandaan kom. 

As ons vandag deur Woord (ore) en Sakrament (oë) herinner word aan ons afkoms en verlede, dan behoort dit ons te bring by ware aanbidding. 

Miskien moet ons ons net weer bekeer oor watter plek die Sondag in ons lewe en weeklikse roetine inneem, sodat ons nie fokus verloor deur al die ander wêreldse aanbiedinge op Sondae nie. 

God roep jou, kom les jou dors met die Lewende Water

Skriflesing: Jes 55:1-13 (1983)
Teksvers: Jes 55:1-5; Open 22:17

Goeie nuus vir ons almal vanmôre, vir sondaars en verlorenes, vir alle volke, alle nasies en alle tale, vir verloste sondaars! 

Jes 55:1: “Kom almal wat dors is, kom na die water toe, selfs ook die wat nie geld het nie, kom koop en eet; ja, kom, koop sonder geld en sonder om te betaal, wyn en melk.” 

Dit is ‘n teenstrydigheid in die algemeen, hoe kan jy koop sonder om te betaal, sonder geld en nie net stapelvoedsel nie, maar wyn en melk? Vir die algemene verstaan ʼn paradoks, maar vir Christen-gelowiges, ‘n ryke vertroosting en versterking uit die Woord. Die rede is omdat daar reeds vir ons betaal is, nie met geld nie, maar met Jesus Christus se eie liggaam en bloed. Ons is losgekoop van ons sondige bestaan vir ‘n bestaan van volkomenheid en liefde by God. 

Hierdie wonderlike uitnodiging lees ons ook van in Open 22:17

“Die Gees en die bruid sê: “Kom!” 
En elkeen wat dit hoor, moet sê: “Kom!” 
En elkeen wat dors het moet kom; 
Elkeen wat die water van die lewe wil hê, 
moet dit kom kry, VERNIET!” 

Verskillende opvattinge oor die Nagmaal      

(Bron: Feenstra, JG 1986 p244) 

Hoekom vier ons vandag die heilige Nagmaal? Wat is die betekenis van die Nagmaal en waarop dui die brood en die wyn? Die Heidelbergse Kategismus behandel die Heilige Nagmaal en wel in Sondag 28-30 so ook die Nederlandse Geloofsbelydenis, art 33,35 

Om hierdie vrae te antwoord en tot dié belydenis te kan kom, was daar ’n heftige stryd tydens die Reformasie gevoer oor die betekenis van die heilige nagmaal. Die opdrag het tog van Jesus Christus self gekom om nagmaal te vier en Hy het gesê: “Dit is My liggaam en dit is My bloed!” Die woordjie “is” kan verskillende betekenisse hê wat dui op verskillende opvattings van die verstaan van die brood en die wyn. Bv. Wanneer ek ’n foto van ’n olifant bekyk, kan ek sê: “Dit is ’n olifant!” Terwyl dit eintlik ’n foto van ’n olifant is. As Jesus dan sê van die brood: “Dit is my liggaam!” wat beteken dit? 

1 Die Roomse kerk leer die transubstansiasie. 

Volgens hierdie siening moet die woordjie “is” letterlik verstaan word en verander die brood letterlik in die liggaam van Christus en die wyn letterlik in die bloed van Jesus Christus. 

2 Luther leer die konsubstansiasie. 

Luther het nie geheel en al met die Roomse nagmaalbeskouing gebreek nie. Volgens hom verander die brood en wyn wel nie in die liggaam en bloed van die Here nie, maar die liggaam en bloed “is” daarin. Soos water in ’n spons is, so “is” Christus in die brood en wyn. 

3 Zwingli leer die figurasie. 

Uit reaksie teen Rome het hy te ver gegaan en gesê dat ’n mens die woordjie “is” heel gewoon moet opvat en in die nagmaal slegs ’n gedagtenismaal moet sien. Soos ons dan op ons verjaarsdag ons geboortedag herdenk, so herdenk die kerk by die nagmaal slegs die lyding en sterwe van die Here. 

4 Calvyn leer die sakramentele betekenis van die Nagmaal. 

Calvyn leer dat die brood en wyn tekens maar ook seëls is van die liggaam en bloed van Jesus. Christus is na sy Godheid, majesteit genade en Gees by die nagmaal teenwoordig. Dit is sakramenteel. Dit is tekens en seëls. Die betekenis is heilig. Daarom moet ons dit met die grootste respek en eerbied en verantwoordelikheid in die geloof gebruik. 

Verlossing het nie goedkoop gekom nie. Daar is ten duurste voor betaal met die bloed en die liggaam van ons Here Jesus Christus. Daarom moet ons dit met ’n opregte geloof, in die regte gesindheid tot versterking en opbou van ons geloof gebruik. 

Ds. Gerrit 

« Older posts